Отпушок од цигара најверојатно бил причина за огнот кој предизвика паника и евакуација во болницата 8-ми септември во Скопје. Утрината во одделението за ортопедија се случувала вистинска драма кога најпрво се проширил чад а потоа избувнал и оган. За многу кратко густиот чад се проширил низ целиот оддел. Вработените и пациентите веднаш биле евакуирани а за многу кратко време пристигнале противпожарните служби. Еден од присутните пациенти кој бил во непосредна близина сведочи дека се се случило за многу кратко време.
„Околу 11 саатот, во вториот спрат, чад. Еден чад, еден невнимателен пациент запалил цигара на количка и ја оставил цигарата, како било не знам само одеднаш се појавил голем чад, голема паника кај сите. Викнаа пожарна дојдоа луѓето за 15 минути средија работа, ништо не е сериозно, ништо не е опасно“, изјави сведок
Од болницата соопштија дека веднаш реагирале и самите го изгаснале пожарот уште пред да дојдат пожарникарите, со опремата со која располага болницата. Штетата била незначителна.
„На местото на пожарот нема електрична ниту гасна инсталација. Материјалната штета е незначителна. Според првичните информации, можно е пожарот да бил предизвикан од отпушок од цигара. Точната причина и околностите се утврдуваат“, соопштија ГОБ „8-ми Септември“ – Скопје
Командирот на Противпожарната бригада Звонко Томески појасни дека пожарот започнал од количките.
„Добиен е повик преку 112 и веднаш се упатени 4 возила во болницата. Гореле инвалидски колички на тераса од болничка соба. Веднаш со противпожарните апарати се изгаснати. Значи, пожарот бил од количките, не се запалила никаква инсталација”, изјави Звонко Томески, командир на Противпожарната бригада
Во пожарот нема повредени но неколку од пациентите кои биле зафатени од густиот чад биле пратени на кислородна поддршка. Центарот за управувње со кризи потврди дека станувало збор за пожар во внатрешна просторија кој бил локализиран за многу кратко време. Сите пациенти и вработени се безбедни, а болницата продолжува со редовна работа.

