На денешната панел-дискусија „Повеќе учество – Повеќе демократија“, во организација на Унија на жени на ВМРО-ДПМНЕ се обрати Ленче Нелоска потпретседателка на Унија на жени на ВМРО-ДПМНЕ која истакна дека зголеменото учество на жените во политичкиот и демократскиот живот е од особено значење за креирањето политики кои одговараат на потребите на граѓаните.
„Учеството на жените во демократијата е клучен елемент во фундаментот на демократијата, се подразбира дека мора да има подеднакво учество и да се слушне подеднакво секој еден глас за да можеме и како политика и како партија да одговориме на барањата на популацијата, кога се жените вклучени во политиката секогаш има поголем фокус на аспектите како што се социјална заштита и грижа на деца, здравство и репродуктивно здравје“, рече Нелоска и додаде:
„Бројни истражувања потврдуваат дека во земјите каде што жените се активно вклучени во економскиот и политичкиот живот имаат подобри и постабилни економии, исто така колку е поголемо учеството на жените во јавниот живот толку е пониско и нивото на корупција. ВМРО-ДПМНЕ секогаш носи стратешки и системски измени, во 2002 година за прв пат донесе измена во Изборниот законик каде што 30% жени беа задолжителни да бидат на избирачките листи а во 2015 повторно се направи измена и овој процент е 40 во моментов, со ова се обезбедува првиот чекор кон праведност и еднаквост со што е обезбеден демократски легитимитет“.
