Македонската економија засега останува стабилна, и покрај глобалната неизвесност и воените тензии на Блискиот Исток – велат од Народната банка. Сепак, оттаму предупредуваат дека растот на цените на нафтата може да донесе нов удар врз инфлацијата. Очекувањата за увозните цени, особено за нафтата, се значително зголемени во однос на претходните прогнози, што значи дополнителен ризик во наредниот период.
„Движењата остварени кај главните макроекономски показатели засега се во рамките на очекувањата според последните проекции, но со нагласени ризици поради неизвесноста од интензитетот и времетраењето на конфликтот на Блискиот Исток“, се наведува во соопштението.
Инфлацијата конечно се стабилизираше, во февруари падна под 3 проценти, но овие податоци се пред почетокот на конфликтот на Блискиот Исток.
Домашната економија, сепак, покажува отпорност, смета Народната Банка.
„Досега се покажа дека домашната економија е главно отпорна на неизвесното и променливо надворешно окружување и во 2025 година забележа забрзан економски раст, што се должи на домашната инвестициска активност, но и на солидниот извоз, а остварувањата се во согласност со проекциите“, констатира Советот на НБРМ.
Главниот ризик останува цената на енергенсите на светските берзи. Од неа ќе зависи и инфлацијата до крајот на годинава.
Од Finance Think излегоа со три сценрија, во зависност од глобалните тензии.
Доколку конфликтот трае пократко, се очекува раст на цените на пролет, но стабилизација и инфлација под 3.5% до крајот на годината.
Во понеповолното сценарио, поскапувањата се посилни и подолго траат. Се предвидува инфлација до 6%.
Третото, најлошо сценарио, предвидува раст на цените и над 8%.
Сепак, во ниту една од овие анализи не се земаат предвид мерките што ги презема или евентуално ќе ги преземе власта, како што беше намалувањето на ДДВ-то за горивата кое значително придонесе за стабилизација на цените.