Регионалното здружение „Напредни лозари” ја поддржува иницијативата на граѓанското здружение „Ековита” од Неготино за одржување референдум против изградба на депонија близу неготинското село Пепелиште.
-Ги поддржуваме во заложбите против изградба на депонија зашто тквешкиот регион е познат како добар лозаровинарски крај. Се плашиме дека евентуална изградба на депонија може да има негативни последици врз лозаровинарството. Се залагаме за чиста животна средина и органско производство, рече денеска претседателот на здружението, Трајче Кулев.
Претседателот на „Ековита”, Сашко Тодоров нагласи дека продолжува собирањето 3.200 потписи, по што ќе следува референдум по ова прашање.
-Досега имаме собрано 2.800 потписи и сигурни сме дека ќе го собереме потребниот број, по што ќе одиме на референдум. Целта е никогаш овде да не се гради таков објект. Велат дека се работи за инертен индустриски неопасен отпад, но ние се сомневаме во тоа, стравуваме за здравјето и животната средина, нагласи Тодоров.
