Сараево се соочува со сериозна здравствена и комунална криза, откако е прогласена епидемија на лептоспироза, позната и како „стаорска треска“.
Оваа опасна болест, која се пренесува преку урина или измет од заразени глодари, предизвикува симптоми како главоболки, болки во мускулите, крварење во белите дробови, жолтица и во најтешките случаи – бубрежна инсуфициенција.
Во последните 24 часа, најголемата болница во земјата пријавила 12 нови случаи на лептоспироза, а вкупниот број на заразени во регионот на Сараево достигна 43 . Здравствените власти алармираат дека ситуацијата е резултат на неуспешни тендерски постапки за дератизација и санитарна заштита, кои не се спроведувале во последните две години.
Градот е преплавен со стаорци, особено во близина на реката Миљацка и јавните површини, каде што се забележуваат преполни контејнери и нерегуларни депонии. Граѓаните споделуваат фотографии на социјалните мрежи, изразувајќи загриженост за состојбата во која се наоѓа нивниот град.
