Една поплава беше доволна да покаже колку се ранливи државните податоци и колку ни е потребен национален дата центар. Локацијата е утврдена, државата активно бара меѓународни партнери за финансирање на проектот, а во меѓувреме се работи и на урбанизација на парцелата. Министерот за дигитална трансформација Стефан Андоновски очекува камен темелникот да биде поставен во 2027 година.
„Веќе ја утврдивме локацијата, треба да ја урбанизираме за да аплицираме до меѓународни партнери за финансирање, точно ја знаеме парцелата, кога ќе имаме договор со утврдена локација со урбанистички проект ќе го презентираме на јавноста, се надевам 2027 ќе успееме да ставиме камен темелник на нац податочен центар.“– вели министерот за дигитална трансформација Стефан Андоновски.
Националниот податочен центар е планирано да се изгради во близина на Скопје, во непосредна околина на Технолошко-индустриските развојни зони кај Бунарџик. Како што претходно беше објавено се работи за парцела на која нема плодно земјиште.
Според министерот, неодамнешната поплава во поранешната зграда на „Нова Македонија“, каде што е сместено и министерството за дигитална трансформација, ја покажа ранливоста на државните системи. Изградбата на националниот центар треба да обезбеди посигурно чување на државните податоци и поголема отпорност на електронските услуги при непредвидени ситуации.
„Ги преместивме сите сервери за да не си дозволиме да имаме прекин. Не е подготвена секоја институција да реагира исто, кога ќе имаме еден национален податочен центар тоа е обврска на една институцијса, ќе има второ напојување, батерии, агрегати.“- вели Андоновски.
Се комуницира со потенцијални инвеститори, но засега не се откриваат имиња на компаниите. Во процесот е вклучен и приватниот сектор кој може да придонесе со инфраструктура, знаење и опрема.
