Министерството за правда соопшти дека на ЕНЕР е објавен предлог-законот за изменување и дополнување на Законот за лобирањето.
Со предлог-законот, како што наведува, се нудат решенија за зајакнување на транспарентноста, интегритетот и отчетноста во процесите на креирање и спроведување на јавните политики.
– Со предложените измени се проширува опфатот на лобирањето на процесите на донесување, изменување, спроведување и евалуација на јавните политики, се прецизираат правилата за застапување на јавниот интерес, се зајакнуваат механизмите за спречување прикриено и недозволено лобирање, вклучително и преку дигитални канали и социјални мрежи, се воведуваат обврски за органите кај кои се лобира во однос на одговорот и остварувањето на контактите и се унапредува транспарентноста преку објавување информации за учесниците, застапуваните интереси, иницијативите и официјалните средби – истакнува Министерството.
Со предложеното решение се зајакнува и надзорот и контролата од страна на Државната комисија за спречување на корупцијата и се предвидуваат нови и повисоки прекршочни санкции за непочитување на законските обврски.
– Целта е да се создаде појасен и поефикасен систем во кој лобирањето е легитимен и транспарентен инструмент за учество во креирањето јавни политики, а истовремено се спречува прикриеното и недозволено влијание врз јавните одлуки – напоменува Министерството за правда.
