Најмалку 15 луѓе се повредени откако трамвај полн со патници излета од шини и се удри во зграда во Белград. Единаесет од нив се пренесени во болница, но ниту еден не е во животозагрозувачка состојба. Меѓу повредените има и две деца. Сѐ уште нема официјални информации за причината за несреќата. Не е познато дали станува збор за инфраструктурен проблем или несреќата е предизвикана од човечки фактор. Возачката кабина на трамвајот е целосно уништена, прозорците на трамвајот се скршени, а дел од седиштата се откорнати.
Градското сообраќајно претпријатие соопшти дека според прелиминарните информации постојат индикации дека една од можните причини за инцидентот би можела да биде човечкиот фактор, имено несоодветната брзина на возилото при минување низ префрлувачот, како и проверка на положбата на самиот префрлувач. Надлежните служби велат дека до крајот на истрагата ќе бидат земени предвид сите вештачења за целосно да се расветли несреќата.
