Министерството за внатрешни работи информира дека во последното деноноќие имало шест пријави за семејно насилство, при што лишени од слобода се три лица.
Во Штип денеска во 02:35 часот, полициски службеници од СВР Штип го лишиле од слобода М. Б. (55) од Штип, постапувајќи по претходна пријава дека на вчера околу 22:00 часот во семејниот дом физички ја нападнал неговата 49-годишна сопруга. Според пријавеното, тој подолг период вршел физичко и психичко насилство во домот и физички ги напаѓал неговата сопруга и малолетните деца.
Полициски службеници од СВР Куманово вчера во 22:15 часот го лишиле од слобода А. Д. (43) од Куманово, постапувајќи по претходна пријава дека во семејната куќа во Куманово се однесувал агресивно и физички ја нападнал неговата мајка.
Во СВР Куманово денеска во 03:15 часот, 28-годишна жена од Куманово пријавила дека, по претходна расправија, била физички нападната од нејзиниот поранешен партнер С. А. (36) од кумановско село.
Во ОВР Струга, вчера во 19:40 часот 37-годишна жена од Република Албанија, со престој во струшко, пријавила дека нејзиниот сопруг Н. М. од струшко, со кој се во бракоразводна постапка, ја следи и ѝ упатувал закани.
Во Велес вчера во 15:30 часот, полициски службеници од СВР Велес лишиле од слобода 40-годишник од велешко село. Според пријавеното, тој најпрво во домот на негов пријател, а потоа и на улица физички ја нападнал неговата 37-годишна партнерка. По преземени мерки било констатирано дека 40-годишникот бил под дејство на алкохол, односно му биле измерени 1,21 промили алкохол во крвта. Тој бил задржан во полициска станица и известени биле јавен обвинител и Центар за социјални работи Велес.
Во СВР Скопје вчера во 18:30 часот, 40-годишна жена од Скопје пријавила дека околу 17:20 часот во викенд куќа во скопско, по претходно недоразбирање, била физички нападната од нејзиниот партнер А. Т. (40).
Од МВР информираат дека се преземаат мерки за расчистување на случаите и по нивно целосно документирање против сторителите ќе бидат поднесени соодветни пријави.
