Скопје вечерва е домаќин на музичкиот проект „TRANSMIssION“, кој на сцената во „Public Room“ носи уникатен спој на традиционални балкански ритми и современа електронска музика, предводен од македонскиот перкусионист и композитор Александар Петров.
Проектот претставува звучно патување што ги надминува класичните жанровски рамки, ставајќи го тапанот во центарот како симбол на културната меморија и динамиката на музичкиот израз.
– Срцето го дава ритамот на животот, тапанот го дава пулсот на срцето е водечката мисла на концептот „TRANSMIssION“.
Концертот е поделен во две целини. Во првиот дел, „TRANSMIssION Acoustic“, публиката ќе има можност да слушне авторски композиции на Петров, како и изведби инспирирани од македонското музичко наследство и етномузиколошките записи. Вториот дел, „TRANSMIssION Electronic“, носи современи електронски звучни структури, импровизации и амбиентални музички пејзажи.
Покрај Петров, на сцената настапуваат и вокалистката Тања Царовска, трубачот и мултиинструменталист Симеон Петров и француската диџејка и продуцентка Lenna.
Царовска е препознатлива по својот вокал во бројни филмски и театарски продукции, меѓу кои „The Passion of the Christ“ и „Troy“, додека Симеон Петров носи искуство од класичната и џез музичката сцена. Lenna дополнително ја збогатува програмата со сетови што комбинираат Tech House и Afro House звук.
Александар Петров, кој дел од својата кариера ја гради и во Париз и Њујорк, важи за еден од ретките музичари што успешно го интегрира традиционалниот македонски тапан во современи музички форми, од џез до експериментална музика.
-TRANSMIssION“ е проект што ги поврзува традицијата и современоста, акустичното и електронското, локалното и универзалното – велат организаторите, додавајќи дека станува збор за концерт што не само што се слуша, туку и се доживува.
