Мултимедијалниот проект „ЗОО приказни“, преку кој најмладите посетители ќе се запознаат со фламингата, шимпанзата, антилопите, зебрите и лавовите, денеска ќе биде реализиран во едукативниот центар на Зоолошката градина во Скопје.
Проектот го организира ЈУ Детски културен центар – Карпош во соработка со Зоолошката градина – Скопје, а годинава пред публиката ќе бидат претставени пет нови едукативни приказни посветени на животните кои живеат во градината.
Организаторите посочуваат дека целта е преку приказни и мултимедијални содржини децата да се запознаат со животните, нивните живеалишта и начинот на исхрана, но и да научат повеќе за културата на однесување при посетите на Зоолошката градина.
Овогодишниот циклус е посветен на вредности како скромност, искреност, одговорност, сигурност и припадност, кои се обработуваат преку приказните за фламингата, шимпанзата, антилопите, зебрите и лавовите.
