По повод Меѓународниот ден на семејството – 15 Мај, попладнево во Скопје ќе се одржи мото-дефиле во организација на СОС Детско село и Мото клубот „Вепар“.
Дефилето е закажано за 17 часот, а збирното место на моторџиите е локацијата „Фонтана парк“ во Скопје. На стартот се најавени изјави од претставници на СОС Детско село и на Мото клубот „Вепар“.
Организаторите информираат дека настанот има за цел да испрати порака за важноста на семејството, заедништвото, поддршката на најранливите и грижата за децата и младите без родителска грижа.
– Со оваа активност, СОС Детско село во својата јубилејна година ја подигнува јавната свест за важноста на семејството, грижата и поддршката од заедницата, со порака дека секое дете заслужува да расте со љубов, сигурност и стабилна поддршка – стои во соопштението.