Во Основниот кривичен суд во Скопје повторно започна судењето за злоупотреба на спортски ваучери, во кое се обвинети дванаесетмина, вклучувајќи ги поранешните директори на Агенцијата за млади и спорт, Дарко Каевски и Наумче Мојсовски. Сите обвинети на денешното рочиште изјавија дека не се чувствуваат виновни.
Процесот продолжува со нов судечки совет, откако претходната судијка беше избрана за членка на Судскиот совет.
Одбраната денеска побара прекин на постапката, повикувајќи се на измените во Законот за спорт, со кои, според адвокатите, престанува правниот основ за обвиненијата.
„Судот треба да ја прекине постапката или обвинителството да го повлече обвинението. Измените на Законот за спорт, донесени во август 2024 година, го укинуваат членот што претставува основа за обвинението,“ изјави адвокатот Петре Шилегов, бранител на Дарко Каевски.
Обвинителката Лидија Раичевиќ, пак, ја отфрли оваа иницијатива, нагласувајќи дека „тежиштето на кривичното дело лежи во дејствијата кои биле извршени, а законските измени не значат декриминализација на истите“. Таа предложи доказната постапка да продолжи, освен во делот на новите докази.
