Торба Луј Витон влезе во судница за случајот „Рекет“, но не онаа на Боки 13, оваа била пронајдена во домот на второобвинетата Катица Јанева. Втор ден како во судот се презентираат материјалните докази, а денеска судницата повеќе личеше на модна ревија, а во фокусот беше гардеробата на Бојан Јовановски. „Луј Витонот“ од видеата на Ла Верита се уште го нема, а ги нема ниту парите, 1,5 милион евра кои Орце Камчев тврди дека им ги дал на Зоки Кичеец и Бојан Јовановски. Ирена Фрчкоска, адвокатката на поранешната шефица на СЈО, не сакаше многу да коментира пред медиумите, само кратко порача дека во судницата се видело дека торбата на Јанева не истата како онаа на Боки 13.
-Вчера излегоа некои написи дека се работи за торбата Луј Витон која е одземена од Катица Јанева, дека станува збор за истата торба која ја споменува сведокот. Денеска имавте прилика да видите дека не станува збор за истата торба, тоа би го коментирале, изјави Фрчкоска.
Во судница беа презентирани и останати предмети одземени од куќите на Јанева во Скопје и Гевгелија, како и од канцеларијата во СЈО. Меѓу нив нотеси и други бели листови на кои бие напишани белешки. Внимание предизвика текст напишан со пенкало каде пишуваше- „други снимки мислам нема.“ Адвокатот на Јанева, Дељо Кадиев вели дека се уште немале увид во дел од доказите кои денеска Обвинителството ги презентираше.
-Тек треба да видиме за што се работи. Ние немаме причина да тврдиме нешто што не е така, затоа што тоа што ни е дадено е снимено на УСБ и се гледа дека е тоа така. Веројатно е пропуст кој што сега судот ќе го исправи. Ќе видиме за кого се работи дали се некои белешки за своја употреба и така, изјави Кадиев.
Презентирани како докази беа предмети кои биле одземени од становите на Јовановски во селото Орман и населбата Тафталиџе. Имаше скап ентериер и мебел, многу парчиња брендирана гардероба, четири пиштоли, муниција, и банкноти од 50 евра, но премногу малку во однос на оние пари кои Боки 13 наводно ги земал од Орце Камчев. Иако веќе осуден презентирани беа предмети одземени од кај Зоран Милески- Кичеец, од таму во очи паднаа повеќе пушки, пиштоли и муниција.
Матеја Петровски
