Пред да дојде на власт лидерот на СДСМ ветуваше реформа во судството и негово отворање како пупка. Заев дури и раководеше со Советот за реформи во овој сегмент. Но дали имаше резултати? Во текот на трите изминати години, обвинувања дека власта се меша во работата на судиите и обвинителите, доаѓаа од повеќе страни.
Но, пред крајот на мандатот проговори некогашната потпретседателка на СДСМ. Откако стана обвинета во случајот за Меѓународниот сојуз обвини за политички притисоци врз Обвинителството, со цел да се стопира нејзиниот ангажман во партијата за наредниот период.
-Факт е дека порачките за политички елиминации на најгруб можен начин се уште функционираат. Јас сум длабоко убедена дека изборот на денешниот ден не е случаен, имајќи во предвид дека политичките амбиции на одредени лица се пресилни за да земат во предвид било какви професионални ангажмани мои во минатото, изјави Ременски.
Не само Ременски, дека политиката е вмешана во судството, обвини и поранешниот другар на функционерите од СДСМ, Бојан Јовановски. Човекот кој до пред неколку месеци имаше редовни средби со екс премиерот Заев, министри и градоначалници, сега се пожали дека политички затвореник.
-Го известувам судот дека се чувствувам како политички затвореник преку кој политичките субјекти ги водат своите битки со овој предмет… Се чувствувам загрозено и понижено и укажувам дека добивам закани за моја физичка ликвидација. Испратив писма до надлежните институции, вклучувајќи го и Љубомир Јовески. Одговор оттаму немам добиено, кажа пред судот Јовановски.
И покрај ваквите напади, од партијата на власт тврдат дека не се мешале во судството.
-Мешањето во третата власт е нешто кое не е карактеристика на ова парламентарно мнозинство и на оваа извршна власт. Да ги оставиме правосудните органи да ја извршуваат својата работа, изјави пратеникот Хари Локвенец.
Дека се потребни реформи во судството подолго време пораки испраќаат и од Европската унија, а експертската јавност во Македонија пак предупредува дека ништо од препораките на Прибе се уште не е исполнето.
Матеја Петровски
