Во пресрет на 1. март – Денот на Баталјонот на специјални сили на македонската Армија, министерот за одбрана Владо Мисајловски им се заблагодари на припадниците на најелитната единица „Волци“, кои како што вели се херои и храбри лица кои секогаш се максимално посветени, пожртвувани и мотивирани да застанат на браникот на татковината и тоа го прават затоа што имаат огромна љубов кон нашата татковина, Македонија. На својот Фејсбук профил, министерот Мисајловски напиша.
„Ви изразувам искрена благодарност и признание за професионализмот и храброста што ја покажувате секој ден. Вашата служба е пример за највисоките стандарди на посветеност и стручност. За вашите достигнувања не постојат доволно зборови кои ќе ја опишат вашата улога и значење за Македонија. Вашата енергија, храброст и посветеност ја прават нашата безбедност и иднина посигурни. Продолжете гордо и посветено да го покажувате ликот на македонската Армија“ истакна Мисајловски.
