Размената на искуства и можностите за соработка во спроведувањето на здравствените реформи беа во фокусот на средбата на министерот за здравство Сашо Клековски со словенечкиот министер за здравство, Тадеј Острц.
Како што соопштуваат од Министерството за здравство (МЗ), ова е прва официјална работна посета во странство на министерот и на неа се разговарало за клучните предизвици во двата здравствени системи, подобрувањето на здравствените услуги и јакнењето на партнерството меѓу Македонија и Словенија во областа на здравството.
– Изборот на Словенија за првата официјална средба со странски колега ја одразува важноста на заедничката историја, сличностите во политичкиот систем, географските и демографските карактеристики, како и словенечките искуства во спроведувањето на здравствените реформи. На средбата беа разменети информации за состојбите, предизвиците и плановите во двата здравствени системи. Посебен акцент беше ставен на Националната диспечерска служба и на Словенечкиот индекс за итна медицинска помош, програмите за рана детекција на рак и управувањето со радиодијагностиката – стои во соопштението од МЗ.
Од таму дополнуваат дека двајцата министри се договориле разговорите да продолжат и за другите реформски планови, како и за постојниот заеднички проект за реформа во областа на медицинските сестри.
– Во разговорот беше истакната потребата од подобрување на здравствената заштита за македонските студенти во Словенија, како и од проширување на можностите за размена на стручњаци и за лекување – дополнуваат од таму.
Министерот изразил благодарност до својот словенечки колега за отвореноста и подготвеноста за споделување на словенечките искуства како поддршка во унапредувањето на здравствениот систем.
