Министерот за правда Јетон Шасивари оствари средба со раководителот на Програмската канцеларија на Советот на Европа во Скопје, Олег Солдатов, на која беше разговарано за досегашната и идната соработка во областите од значење за Министерството за правда, информираат од Министерството.
На состанокот била изразена подготвеност за продолжување на интензивната соработка и поддршка во повеќе значајни области, меѓу кои: бесплатната правна помош, зајакнувањето на капацитетите на затворскиот систем, слободата на изразување и медиумите, како и борбата против говорот на омраза, нетолеранцијата и дискриминацијата.
Поддршката на Советот на Европа, велат од Министерството за правда, е од исклучително значење за унапредување на реформите во правосудството и јакнење на институционалните капацитети.
Заедничката посветеност, партнерството и координираниот пристап ќе бидат клучни за успешно спроведување на проектите и постигнување конкретни резултати во интерес на граѓаните.
