Министерството за правда, постапувајќи по заклучокот од 50-та седница на Владата на РМ одржана на 11 февруари, годинава, презеде активности и подготви мислење за предлог-разрешување на државниот јавен обвинител, кое го достави до Владата за натамошно процесирање согласно Законот за јавното обвинителство и Уставот на Македонија.
„Во изминатиот период бевме сведоци на низа скандали, нарушена функционалност на јавното обвинителство, нарушени меѓучовечки односи, незаконски постапувања и корупција, неефикасност во кривичното гонење и повреда на принципите на организација на јавното обвинителство и самостојноста во вршењето на функциите на обвинителите во Вишото јавно обвинителство“, се наведува во денешното соопштение од Министерството за правда
Државниот јавен обвинител на Македонија, како што велат од Министерството за правда, постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои околности тој требало да знае и требало да се изземе.
„Воедно, во јавноста беа лиферувани и информации, и податоци за предмети, со што е повредена обврската за тајност во постапките“, се наведува во соопштението.
Од Министерството за правда посочуваат дека во Законот за јавното обвинителство е наведено дека јавниот обвинител на РМ е одговорен за општите состојби во врска со организирањето и извршувањето на функциите на јавното обвинителство и за својата работа одговара пред Собранието. Собранието пак, како највисок претставнички орган на граѓаните е уставно надлежен за именување и разрешување на јавниот обвинител на Македонија.
Владата пред три донесе одлука да поведе постапка за разрешување на државниот јавен обвинител, Љупчо Коцевски, поради постапување надвор од законските надлежности и ниската доверба на граѓаните во правосудството.
