Министерката за образование и наука Весна Јаневска денеска ќе учествува на настан во рамките на програмата за одбележување на Европската ноќ на истражувачите 2026.
Настанот, како што информира МОН, ќе се одржи во 12 часот на Машинскиот факултет во Скопје, а е поддржан преку акциите „Марија Склодовска-Кири“ од програмата „Хоризонт Европа“.
– Приклучувањето на Северна Македонија кон одбележувањето на Европската ноќ на истражувачите е на иницијатива на Универзитетот „Св. Кирил и Методиј“ – Скопје, Универзитетот „Гоце Делчев“ – Штип, Универзитетот „Св. Климент Охридски“ – Битола и Македонската академија на науките и уметностите, со поддршка од Министерството за образование и наука – се наведува во соопштението.
Во рамките на настанот се предвидени повеќе работилници, лабораториски посети, презентации и изложби на студентски и научноистражувачки проекти, како и други интерактивни активности.
Европската ноќ на истражувачите има цел да ги доближи науката и истражувачката работа до јавноста, особено до младите, преку непосредно запознавање со научните и истражувачките активности.
