Достоинство, обединување, фокус на вистинските вредности, среќа и желба Македонија да стане подобро место за живеење – државно-политичкиот врв им го честиташе Божиќ на верниците од католичка веродисповед. Претседателката Гордана Сиљановска-Давкова повика да го чуваме и почитуваме достоинството за да бидеме и самите достоинствени и почитувани.
„Радувајќи им се на празничните денови во топлината на нашите домови и во кругот на најблиските, да не заборавиме на нашиот заеднички дом – татковината“ вели Гордана Сиљановска-Давкова, претседателка на државата
На граѓаните празникот Божиќ, кој католиците и дел од православните верници го слават според Грегоријанскиот календар им го честиташе и Претседателот на Собранието на Македонија, Африм Гаши.
„Овој празник нè повикува да размислуваме за заедничките вредности на солидарноста, толеранцијата и соживотот – вредности кои нè обединуваат како општество и нè водат по патот на единството“ вели Африм Гаши, претседател на Собрание
Честитка испрати и премиерот на државата, кој во негово име и во име на Владата вети дека ќе работат Македонија да биде подобро место за живеење.
„Нека нашата Татковина биде подобро место за живеење, земја на нови големи победи и најважно – држава со повеќе среќни граѓани... Радосната вест која се пренесува низ генерации, повторно нека го огрее срцето на секој верник и сограѓанин“ вели Христијан Мицкоски, премиер
Лидерот на опозициската СДСМ, Венко Филипче, на граѓаните им посака со добра мисла да ги дочекаат божиќните и новогодишните празници.
„Во овие празнични денови да го насочиме вниманието кон вистинските вредности за солидарност, почит, меѓусебно разбирање и грижа едни за други“ вели Венко Филипче, лидер на СДСМ
Честитки по повод празникот упатија министри, пратеници, градоначалници, функционери, партии и организации.
Давид Крстевски
