Премиерот Мицкоски, во синоќешното интервју за Телевизијата 21, откри дека ексдиректорот на „Лотарија на Македонија“, како и поранешниот потпретседател на Владата Артан Груби, не се достапни на органите на прогонот и според информациите со кои тој располага поранешниот директор на „Лотарија“, подолго време не е во Македонија, додека Груби во придружба на бизнисмен, во возило со дипломатски таблици ја напуштил Македонија, преку граничниот премин со Косово.
За информациите дека Груби не е во Косово туку во Тирана, Мицкоски изјави дека тој има информации како и на кој граничен премин Груби, заминал од Македонија и дека не би можел да каже каде потоа заминал.
Од високи извори се дознава дека Арсим Папранику, почесниот конзул на Косово во Македонија, со своето дипломатско возило, заедно со Артан Груби, ја поминал границата со Косово, еден ден, пред почетокот на полициската акција. Истите извори велат, дека Груби, ја поминал границата, со албански пасош.
