Општинскиот комитет на ВМРО-ДПМНЕ од Кочани синоќа на Споменикот на слободата на локалитетот Локубија ја одбележа 36-годишнината од основањето. На настанот присуствуваа основачите на огранокот и претставници на нивните семејства, членови и симпатизери на партијата, како и граѓани.
Меѓу присутните беа премиерот и претседател на ВМРО-ДПМНЕ, Христијан Мицкоски, генералниот секретар на партијата Драган Ковачки и министерот за дигитална трансформација Стефан Андоновски.
Обраќајќи им се на присутните, Мицкоски рече дека ВМРО – ДПМНЕ и Македонија се сопатници низ времето, бидејќи на 36. годишнина на кочанскиот ОК и се надоврзуваат 35. години самостојност на државата.
-Заедно споеделуваме и убави и помалку убави моменти. Ние и Македонија споделуваме и подеми и падови и победи и порази. Но, она што е важно и денеска треба да го кажеме е фактот дека без ВМРО – ДПМНЕ ја нема Македонија. И тоа секој еден жител на Македонија, секој еден жител на Кочани, треба да го знае. ВМРО – ДПМНЕ е македонскиот идентитет, а без македонскиот идентитет ќе ја нема ни Македонија- порача Мицкоски.
Лидерот на ВМРО – ДПМНЕ им се заблагодари на основачите на Општинскиот комитет од Кочани, луѓе што во тоа време, како што нагласи, имале храброст пред се, биле визионери, знаеле што сакаат, имале цел кон која што се стремеле.
-Во тие времиња кога се уште голем дел од нашите сограѓани сонуваа за некоја друга југословенска федерација, тие со својата храброст одлучија да го формираат ОК на ВМРО – ДПМНЕ во Кочани и да зборуваат за независна, суверена, демократска Македонија, која ќе има своја бакнота, своја фудбалска репрезентација, своја армија и ќе се гордее со тоа – затоа што е Македонија. Затоа, уште енаш, ви благодарам на сите од мое име и од името на Извршниот комитет за сето тоа што го направивте за организацијата и за ВМРО – ДПМНЕ- потенцираше Мицкоски.
На крајот од своето обраќање, Мицкоски нагласи дека ВМРО – ДПМНЕ во овој момент повторо е најголемата политичка сила во државата и пример за останатите политички партии во регионот, па и пошироко, илустрирајќи го ова со резултатите од последните мерења на јавното мислење, според кои, сите политички партии заедно се со помала поддршка од народот од подршката што како единка ја има ВМРО – ДПМНЕ.
На одбележувањето на 36 – те години од основањето на Општинскиот комитет на ВМРО – ДПМНЕ од Кочани поздравен говори одржа и пратеникот Миле Лефков, како и претсдателот на кочанскиот ОК, Александар Андов, кој приликава ја искористи да им додели плакети и признанија на оние што во 1990 – та година во Кочани го основале Општинскиот комитет на денес владеачката партија во Македонија.
Постхумно признание му беше доделено и на Анче Трифунов, за неговиот придонес во работата и опстојувањето на партијата во Кочани.
