Фризерски и козметички салони, автомеханичарски работилници, отворање компании во ИТ-секторот, но и бројни други дејности, се меѓу најчестите идеи со кои невработените лица започнуваат сопствен бизнис. Голем е интересот за мерката за самовработување што ја спроведува Агенцијата за вработување со поддршка од Владата. Годинава аплицирале околу 5.500 лица, од кои 3.000 продолжуваат во вториот круг на конкурирање за грантови и дополнителни обуки.
„Интерес има особено во услужните дејности, особено за фризерски и козметички салони. Би ги издвоил и гранките од занаетчиството, особено градежништвото – молери, електричари, механичари, плочкари – ги има речиси секоја година. Освен овие, во последно време евидентно е дека во ИТ-бизнисот, особено младите, отвораат фирми и имаат добри идеи“, изјави Аднан Ејуп, директор на Агенцијата за вработување
Покрај финансиската поддршка, новите претприемачи добиваат и шестмесечно менторство, со цел полесно да го започнат и развиваат својот бизнис. Висината на грантовите зависи од категоријата на апликантите, при што младите добиваат најголема финансиска поддршка. Лицата до 29 години можат да добијат средства во износ до 10.000 евра.
„Посебен фокус имавме на младите до 29 години, на лицата кои користат гарантирана минимална помош, односно примаат социјална помош, долгорочно невработените лица, лицата кои се повратници од странство, кои првпат беа опфатени со мерка во Оперативниот план, како и на лицата жртви на родово базирано насилство“, изјави, Аднан Ејуп, директор на Агенцијата за вработување
Од Агенцијата за вработување велат дека постојано ги следат потребите на пазарот на труд и се консултираат со засегнатите страни, а во иднина се очекува воведување и нови мерки за поддршка на невработените.