Професионално обучување, експертска поддршка во делот на културата и туризмот, дигитализација на архивските материјали и професионално усовршување на кадри – за ова со потпишување на меморандум за соработка, се договорија министерството за култура и туризам и француската амбасада.
„Веднаш тргнуваме во формирање на работни групи кои ќе започнат со имплементација на сите активности верувам дека ова партнерство ќе донесе конкретни и видливи резултати кои ќе бидат од корист на граѓаните на двете земји“, изјави Зоран Љутков, министер за култура и туризам
Во соработка со националниот аудиовизуелен институт на Франција ќе се асистира во архивирање и дигитализација на аудиовизуелните материјали на Македонија, додека посебен фокус ќе се стави на македонското историско наследство.
„Тоа е посветеноста на Франција заедно со Македонија да работи на заштитата, конзервацијата, реставрацијата и вреднувањето на културното богатство“, изјави Кристоф Ле Риголер, амбасадор на Франција
Веќе е започната соработка со универзитетот Парис 1 Пантеон Сорбон а во рамки на меморандумот се планираат и културни настани како француски театарски групи кои ќе прават изведби во повеќе градови низ државата а македонските уметници ќе имаат повеќе можности за престојување во Франција, посетување фестивали и културни настани.
Бојан Таневски
