Во рамките на јубилејната програма по повод 80-годишнината на Институтот за филозофија при Филозофскиот факултет во Скопје, денеска и утре, ќе се одржи меѓународната конференција „Филозофијата и стварноста“, која ќе обедини филозофи и истражувачи од Македонија и од повеќе земји од Европа и светот.
Како што е наведено во најавата, преку пленарни предавања и тематски сесии ќе бидат отворени прашања за природата на стварноста, знаењето и рационалноста, етиката и вештачката интелигенција, јазикот и мислата, уметноста и технологијата, како и за современата општествена и политичка стварност.
Пленарни предавачи на конференцијата се Стивен Прист (Универзитет „Оксфорд“), Стелиос Вирвидакис (Национален и каподистриски универзитет во Атина), Олга Маркич (Универзитет во Љубљана) и Кармен Велајос Кастело (Универзитет во Саламанка).
Во текот на двата конференциски дена, во Естетичката лабораторија на Филозофскиот факултет, ќе биде отворена и изложбата „Естетичката лабораторија: фрагменти од една историја“, која преку архивски фотографии, документи и други материјали ќе претстави дел од историјата на оваа лабораторија.
Одбележувањето на јубилејот 80 години од Институтот за филозофија почна синоќа, во Музејот на современата уметност – Скопје, со промоција на монографијата „80 години Институт за филозофија – 80 години развој на филозофската мисла на македонски јазик“ од Јасмина Поповска, посветена на институционалниот и интелектуалниот развој на Институтот и на осумдецениското создавање и развивање на филозофската мисла на македонски јазик. Промотори беа проф. д-р Ристо Солунчев и проф. д-р Борче Илиевски.
