Во основните училишта во Општина Чаир во текот на изминатата година се обезбедени 1.000 нови училишни клупи и 2.000 нови столчиња, со што е обновен околу 60 проценти од училишниот инвентар, соопшти денеска градоначалникот на Општина Чаир, Изет Меџити.
Информацијата ја соопшти при посетата на ООУ „Хасан Приштина“ по повод почетокот на новата учебна година, каде што на учениците, наставниците и родителите им посака успешна учебна година.
Според него, само годинава училиштата се опремуваат со 800 нови клупи и 1.600 нови столчиња, со цел да се подобрат условите за учење и престој на учениците.
– Здравјето, правилниот развој и благосостојбата на нашите деца се наш приоритет. За само една година обновивме околу 60 проценти од инвентарот во основните училишта во Чаир, со вкупно 1.000 нови клупи и 2.000 нови столчиња. Инвестирањето во подобри услови во училиштата е инвестиција во нашите деца и во нивната иднина. Ќе продолжиме со истата посветеност, за секој ученик во Чаир да има што подобри услови за учење и развој – изјави Меџити.
Тој упати благодарност до компанијата „Евтинија“ за донацијата и континуираната поддршка, како и до сите кои придонесуваат за подобрување на условите во образовните установи во општината.
По повод првиот училишен ден, на учениците им беа поделени и пакети со училишен прибор.
