Во Музејот на македонската револуционерна борба денеска ќе бидат одбележани 75 години од основањето на Матицата на иселениците од Македонија, институција која повеќе од седум децении работи на одржување на врските меѓу Македонија и македонската дијаспора ширум светот.
На настанот ќе биде промовирана монографијата „Матица на иселениците од Македонија: 75 години матица на Македонците низ светот“, чии автори се Катерина Тодороска, Елена Оровчанец-Спироска и Кристијан Петрески.
За историјата и дејноста на Матицата ќе говори долгогодишната новинарка во илустрираното списание „Македонија“, Фиданка Танаскова, додека промотор на монографијата ќе биде проф. д-р Васил Тоциновски.
Книгата, според најавите, преку архивски документи и историски извори го следи развојот на Матицата од нејзиното основање во 1951 година до денес, прикажувајќи ја нејзината улога во зачувувањето на македонскиот јазик, културата и традициите меѓу иселениците.
Во монографијата се обработени бројните активности на институцијата, меѓу кои соработката со македонските друштва во странство, организацијата на културни и научни настани, поддршката на изучувањето на македонскиот јазик во дијаспората, како и издавачката дејност.
Посебно место во публикацијата има списанието „Македонија“, кое со децении претставувало значаен мост меѓу татковината и Македонците во светот, како и „Иселеничкиот календар“, едно од најчитаните изданија меѓу иселеничките заедници.
Од организаторите посочуваат дека јубилејот е можност да се потсети на улогата што Матицата ја имала во афирмацијата на македонскиот национален и културен идентитет надвор од границите на државата, како и во зачувувањето на врските со македонските заедници во Европа, Австралија, Северна Америка и други делови од светот.
