Во Белград и други српски градови од изутрина се поставуваат блокади на бројни локации, откако студентите ги повикаа Белград, Нови Сад и Ниш целосно да запрат денеска.
Министерството за внатрешни работи предупреди дека блокадите се незаконски и дека ќе бидат преземени сите потребни мерки за да се заштитат јавниот ред и мир.
Блокади во Србија има веќе пет дена, како реакција на апсења на демонстранти. Полицијата соопшти дека вчера биле приведени 79 лица, а имало и повредени во уличните судири.
Во Белград е запрен трамвајскиот и тролејбускиот сообраќај, и така ќе остане додека не се стекнат нормални услови за возење, соопштија од градот.
Српскиот претседател Александар Вучиќ ги повика граѓаните на мир и ги замоли да не се урива Србија.
