МАНУ како највисока научна институција во Македонија, има долг и обврска да го штити македонскиот јазик, култура и идентитет – да бидат безбедни и неоспорувани. МАНУ ја чува и негува традицијата воспоставена од нашите претходници, црпејќи ги искуствата од минатото и користејќи го стекнатото знаење за обезбедување на иднината на научната мисла во сите области на општественото живеење и развојот на Македонија.
Според претседателот на МАНУ, Живко Попов, научно истражувачката дејност и уметничкото и литературно творешство се неразделни во развојот на човекот како интелигентно битие и се дел од неговите најкреативни дејсности. На одбележувањето на Денот на Академијата беше испратена порака дека научниците и надлежните институции во власта мора да соработуваат во спроведувањето на коренити реформи – и во научноистражувачката дејност и во високото образопвание. Одржлив развој на македонското општество ќе има кога ќе се вложува во квалитетет. Попов ја нагласи и посветеноста на владата да се вклучи во изработка на заеднички сеопфатен проект во сите круцијални области на општествено живеење, од кој ќе произлезат приоритетни документи за развој на државста до 2050 година
Владата најави вклученост на МАНУ во носењето на реформите и новите развојни проекти. На овој начин би се отишло чекор напред во однос на усвоената национална стратегија во Собранието преку конкретизација на проблемите и мерките за нивно реформирање, односно имплементација и мониторингот на овие процеси, кое нешто би било координирано од страна на академијата. МАНУ со своите 6 одделенија, 8 научно истражувачки центри и со своето искуство, во соработка со Владата и со професорите и научниците универзитетите и научната заедница има капацитет да работи на овие теми и прашања, рече академик Попов.
Попов ги презентираше и извештаите од Центрите за стратегиски истражувања – кои се занимаваат со области како животна средина, економски раст, енергетика, компјутерски науки и информатички технологии, културно наследство, генетско инжинерство и биотехнологија.
Со цел да ја зачува традицијата но и да го обезбеди континуитетот на македонскиот јазик, МАНУ и во текот на оваа година одржуваше ни организираше настани поврзани со одбележувањето на 80 годишнината од кодификацијата на македонскиот страндарден јазик. Академијата повторно ќе работи на проект од врвен национален интерес за унапредување и заштита на македонскиот јазик.
Македонската академија на науките и уметностите не само што ги чува темелите на македонскиот идентитет, туку и активно ги гради контурите на иднината. Во време на глобални предизвици и брзи општествени промени, МАНУ се позиционира како клучен сојузник во обликувањето на националните приоритети, претворајќи го знаењето во стратегија, а традицијата во визија.
