Македонското друштво „Илинден“-Тирана, ќе учествува на Конгресот на Федералната унија на европски националности (ФУЕН), што ќе се одржи од 17. до 20-ти овој месец во Хелсинки, Финска.
-Изминатите единаесет години, од кога сме рамноправна членка на ФУЕН редовно учествуваме на сите Конгреси и други активности. Ќе учествуваме и на овој конгрес чиј домаќин ќе биде Шведското собрание на Финска (Svenska Finlands folkting/Folktinget in Swedish), кое работи за јазичните права и статусот на шведскиот јазик во Финска, информираше Никола Ѓурѓај, претседател на друштвото.
Според него, Хелсинки ќе стане место за средба на европските малцинства, на 70. конгрес на кој се очекува да присуствуваат претставници на автохтоните национални малцинства, националности и јазични групи од цела Европа.
Друштвото „Илинден“ член е на ФУЕН е од 16 мај 2015 година и е дел од работната група на словенските малцинства. Во овој период редовно учествува на конгреси и други активности, а по предлог на друштвото усвоени се и резолуции за положбата на македонското малцинство во Република Албанија.
Во јуни годинава, беше домаќин на 29. семинар на работната група на словенските малцинства што се одржа во Тирана. Друштвото за првпат беше домаќин на вакво настан на кој учествуваа 40 претсавници на 20 организации од Албанија, Германија, Австрија, Словенија, Хрватска, Естонија, Украина, Унгарија, Србија, Италија и Словачка.
