Во Галерија 73 во Белград денеска ќе биде отворена изложбата „Бруталист“, која е заеднички проект на македонските уметници Благојче Наумоски – Бане и Петар Новковски – INCHRONAX.
Поставката претставува дијалог меѓу два авторски пристапи кон бруталистичката естетика, преку истражување на формата, материјалот, архитектурата и влијанието на времето врз нив.
Како што најавуваат организаторите, изложбата не го третира брутализмот исклучиво како архитектонски правец, туку како визуелен и концептуален јазик преку кој се истражуваат односите меѓу просторот, структурата, материјалот и времето.
Преку своите дела, Наумоски и Новковски создаваат заеднички уметнички простор во кој се спојуваат два различни ликовни изрази, обединети околу интересот за суровата, но силно експресивна естетика на брутализмот.
Изложбата во Галерија 73, според најавите, ќе ѝ овозможи на белградската публика увид во дел од актуелното творештво на двајцата македонски автори и нивните современи интерпретации на бруталистичката визуелна култура.
