На само 12 години, Македон е примен во престижната Програма за талентирани млади при Универзитетот „Џонс Хопкинс“ во САД, со седиште во Балтимор, Мериленд – Baltimore, Maryland, USA, пишува на ФБ неговиот татко Владимир Димитровски. Тој и се заблагодарува на министерката за енергетика, рударство и минерални суровини, Сања Божиновска, за, како што вели, нејзината човечност, разбирање и искрена поддршка за Македон. Нејзиниот придонес за остварувањето на можноста Македон да се запише на Johns Hopkins Center for Talented Youth (CTY), вели неговиот татко, е нешто што за нив има огромно значење.
-Програмата е наменета за ученици со исклучителни академски способности од целиот свет. По тестирањето, Македон го доби и престижното признание „Гранд Хонорс / СЕТ“, за исклучителни резултати по математика и вербални способности. Grand Honors = највисоко признание за исклучително високи резултати во рамките на CTY тестирањето. SET = Study of Exceptional Talent – програма/признание на Johns Hopkins за ученици кои постигнуваат исклучително високи резултати на тестирањата, значително над очекуваното за нивната возраст. На само 11 години постигна и 1440 поени на САТ тестот – 740 по математика и 700 по читање и пишување. Зад сите овие бројки и признанија стои едно нешто – огромна љубов кон знаењето, пишува таткото на Македон.
Додава дека со повеќе од 20 златни медали од меѓународни математички натпревари, Македон продолжува да учи, да сонува и да ги поместува своите граници.
Тој упатува и јавна благодарност до министерката Сања Божиновска.
-Од срце сакаме јавно да ѝ се заблагодариме на министерката Сања Божиновска, а пред сè на човекот Сања, за нејзината човечност, разбирање и искрена поддршка за Македон. Нејзиниот придонес за остварувањето на можноста Македон да се запише на Johns Hopkins Center for Talented Youth (CTY) е нешто што за нас има огромно значење. Зад секој успех на едно дете стојат многу труд, знаење и посветеност, но понекогаш е потребен и човек кој ќе препознае талент, ќе подаде рака и ќе даде поддршка во вистинскиот момент. Ви благодариме, министерке, но пред сè – Ви благодариме, Сања, што покажавте дека зад функцијата стои човек со срце, пишува Димитровски на ФБ.
Вашата поддршка, додава тој, ќе остане дел од патот на Македон кон нови знаења, нови предизвици и нови успеси.
