Во Домот на културата во Кавадарци се одржа свечена манифестација по повод одбележувањето 34 години од основањето на Лекарската комора на Македонија. На настанот присуствуваа високи претставници на здравствените и образовните институции, меѓу кои заменик-министерот за здравство, Јовица Андовски, директорот на Фондот за здравствено осигурување, д-р Сашо Клековски, градоначалникот на Кавадарци, Митко Јанчев, деканите на медицинските факултети, претставници на стручните комори, како и многубројни доктори и гости, се вели во соопштението од Лекарската комора.
Во своето обраќање, претседателката на Лекарската комора, проф. д-р Калина Гривчева-Старделова, се осврна на активностите на Комората меѓу две годишнини нагласувајќи дека изминатиот период беше исполнет со интензивна работа и стратешки активности на домашен и меѓународен план. Како клучен успех во изминатата година беше потенцирано полноправното членство на Лекарската комора во Европскиот совет на лекарските комори, остварено во март годинава, што овозможува директно усогласување со европските медицински стандарди и зајакнување на гласот на македонските лекари во Европа.
По однос на внатрешните предизвици, претседателката јавно укажа на сериозните структурни аномалии со кои се соочува македонското здравство, пред сè со хроничниот дефицит на доктори во одредени градови и специјалности, што доведува до преоптовареност на клиниките и болниците во Скопје, а капацитетите во внатрешноста остануваат недоволно искористени. Во своето излагање таа упати јасен апел до надлежните институции.
„Комората доставува барања и предлози, но ја нема моќта овие предлози да ги имплементира во пракса бидејќи тоа го можат, единствено, креаторите на здравствените политики, а токму тие треба да покажат поголемо разбирање за суштинските барања на Комората затоа што докторите се најважниот ресурс во здравствениот систем и поседуваат стручно знаење и искуство за да поттикнат позитивни промени. Затоа сметаме дека во наредниот период треба суштински да се зајакне институционалниот дијалог со Министерството за здравство и Фондот за здравствено осигурување за реално да може да се спроведат вистински реформи“, истакна проф. д-р Старделова-Гривчева.
Заменик-претседателот на Комората, доц. д-р Беким Исмаили, потенцира дека Комората повеќе од три децении претставува столб на професионализмот, медицинската етика и континуираниот развој на здравствената дејност во нашата земја.
„Во изминатите 34 години Лекарската комора одигра клучна улога во заштитата на интегритетот на лекарската професија, во унапредувањето на високите професионални стандарди и во поддршката на континуираната медицинска едукација. Благодарение на посветеноста и трудот на генерации лекари и здравствени работници, изградивме институција, која ужива доверба и почит како меѓу своите членови така и во пошироката јавност“, рече доц. д-р Исмаили.
Во свечениот дел од настанот беа доделени годишните награди и признанија на истакнати поединци. Највисокото признание на Комората, наградата „Св. Наум Охридски“ за особени остварувања во областа на здравството, му припадна на д-р Мевљудин Куч, а во негово име наградата ја прими син му, д-р Златан Куч. Наградата „Примариус д-р Димитар Ивановски“ за тројцата студенти по медицина со највисок просек ја примија Стеван Богданов од Медицинскиот факултет од Скопје, Александар Величков од Факултетот за медицински науки од Штип и Ерда Алиу од Факултетот за медицински науки од Тетово. Плакетата за најдобар научен труд објавен во официјалното гласило Vox Medici им беше доделена на авторите Шкелќим Мухареми, Ѓулшен Селим, Лилјана Тозија, Јетмир Зиба, Никола Ѓорѓиевски, Игор Николов, Реџеп Селмани и Ванѓелка Коваческа-Шавреска за нивниот труд за дијагностичкиот предизвик кај хантавирусната инфекција.
Комората додели и благодарници за новинари и медиуми, кои преку своите емисии посветени на здравството придонесуваат за подигнување на здравствената култура на населението. Признанија добија Билјана Дебарлиева („Фактор здравје“ – „ТВ 24“), Севдије Метај („Про вита“ – МРТ 2), Александар Динев и Сања Димитровска („Добриот доктор“ – „Сител“), Марија Атанасовска („Телма амбуланта“ – „Телма“), како и Арѓира Елмази и Арта Сефадини („Огледало на здравјето“ – „Алсат М“). Посебна благодарница му беше врачена на градоначалникот на Кавадарци, Јанчев, за неговата несебична поддршка, но и посветеност и континуиран придонес во македонското здравство, како и за покровителството на одбележувањето на годишнината на Комората.
