Територијалната противпожарна единица Куманово годинава бележи околу 100 интервенции помалку во август во споредба со истиот период лани. Според командирот Борис Станковски, во јуни и јули, ТППЕ Куманово имала просечно по 65 до 70 интервенции месечно, без поголеми пожари на територијата на општината.
-Во месецот јуни и јули бележиме во просек околу 65 до 70 интервенции. Во тие два месеци немаше некои позначајни или поголеми пожари на територија на општина Куманово- вели Станковски.
Значителен дел од јулскиот ангажман на пожарникарите бил поврзан со невремето што ја зафати општината. Пожарникарите интервенирале на отстранување паднати дрвја и лимови од покриви, во координација со ЈП „Чистота и зеленило“. Покрај Куманово, ТППЕ интервенира и во соседните општини каде нема противпожарни единици или локалните капацитети не се доволни. Во август повеќепати интервенирала во Липково, вклучително и во Никуштак, каде пожар зафатил и дел од шумски појас.
-Во општина Липково одиме на секоја интервенција затоа што таму нема противпожарна единица- посочува Станковски.
Кумановските пожарникари помагаат и во Старо Нагоричане, каде се ангажираат кога локалните капацитети не можат самостојно да одговорат на пожарите.
