Криминалот на Артан Груби го отсликува владеењето на двоецот ДУИ и СДСМ, а неговото исклучување од матичната партија не ги амнестира интегративците бидејќи тој владееше со нивна поддршка и партиски гласови. Вака дел од политичките аналитичари го оценуваат последно партиско соопштение на ДУИ во кое од партијата го исклучуваат бегалецот Артан Груби. Политичкиот аналитичар Љуљзим Фаризи вели дека ДУИ секогаш употребува трикови, а исклучувањето на високиот партиски функционер е само еден од нив.
Иднината на ДУИ е се понеизвесна откако името на Артан Груби осамна на Црната листа на САД. Аналитичарот Фаризи вели дека во јавноста веќе се зборува дека членови на Алијанса за Албанците по празниците ќе се вратат кај Таравари. Бродот на ДУИ е веќе потонат и се гледа крајот на партијата, прогнозира Фазири.
Додека во јавноста се шпекулира дали Груби е во Косово или Албанија, врие политичката сцена.
Имено, повик до Груби да се врати и да се обиде да ја докаже својата евентуална невиност испрати и коалицискиот партнер на ДУИ, Зијадин Села. Вели ако е невин, тоа треба да го докаже во судска постапка.
Поради сомнежи за сторен криминал Артан Груби заврши на американската црна листа. Тој е осомничен за сторен милионски криминал во Државна лотарија заедно со поранешниот тамошен директор Прпарим Бајрами кој исто така од поодамна не е во државава. За истиот случај кривична пријава добија уште четири други лица. МВР му поднесе кривична пријава и на поранешниот премиер Димитар Ковачевски како и на екс генералниот секретар на владата Методија Димовски. Сепак засега, обвинителството немало докази за нив да ги процесуира.
