Нема веќе бркање на глодари и инсекти, прокиснати тавани, субстандардни услови – за две години Македонија ќе има комплетно обновени студентски домови со европски стандарди.
Привршува реконструкцијата на студентскиот дом „Стив Наумов“, кој се очекува повторно да ги отвори вратите од 1 октомври, а треба да започне и реновирањето на останатите седум.
Реконструкцијата ги опфаќа собите и санитарните јазли, електричната и водоводната мрежа, како и фасадата и системот за греење, со цел да се обезбедат подобри и поквалитетни услови за престој.
„Охрид, Битола, Прилеп, Штип, Пелагонија, „Сениќ“ и кујната во „Гоце“ почнуваат со реновирање во исто време, во зависност од големината на домот реконструкциите и енергетската ефикасност ќе траат година ипол до две. За две години ние ќе имаме комплетно нови студентски домови со европски стандарди“, изјави Весна Јаневска, Министер за образование и наука.
Покрај редовното доделување на 3000 стипендии, оваа година за првпат право на стипендија ќе имаат и студенти со ретки болести, како и студенти со посебни образовни потреби.
„Првпат оваа година воведуваме стипендии за стденти со посебни образовни потреби и за студенти со ретки болести. Тоа е новина, тоа досега го немало“.
Лошите услови за живеење беа причина домот да биде затворен во 2024 година, по што беше направен план за темелна реконструкција на деветте државни студентски домови. За проектот се обезбедени околу 50 милиони евра, од кои повеќе од 10 милиони евра се грантови, со поддршка од Европската Унија, Германската развојна банка и Фондот за инвестиции на Западен Балкан.
