Ниту Косово, ниту Албанија се сигурни засолништа за бегалецот Артан Груби. Иако се шпекулира дека има косовско и албанско и државјанство, тоа не е гаранција дека ќе се спаси од соочување со правдата во Македонија.
Последните шпекулации се дека тој е лоциран во имот на Јадранското море во близина на Драч. Кога Груби преминал од Косово на албанска територија е непознато, но веројатно е дека тоа од претходно планирал бидејќи можноста косовските власти да го кријат речиси и ја нема.
За да си ја спаси десната рака, Али Ахмети замина во посета на Косово само ден откако Груби ја напушти Македонија на Блаце. Но очигледно ниту конекциите на интегративците, не успеале да го заштитат осомничениот вицепремиер за криминал во Државната лотарија.
Од друга страна, дека Албин Курти е поблизок со албанскиот блок партии во Македонија кои се во владејчката коалиција се потврди пред изборите кога ВРЕДИ на Меџити, Касами, Гаши и Таравари доби апсолутна поддршка од него.
За престојот на албанска територија или намерата Груби таму да си добие азил, главен проблем е тоа што заврши на американската листа за корупција во судството. Еди Рама за кој важи дека има проамерикански ставови, малку вертојатно е дека ќе сака да се замери со Вашингтон.
Со политички притисок, шансите се големи Артан Груби да и биде вратен на Македонија, вели универзитетскиот професор Александар Нацев.
- „Знаеме дека целото раководство на ДУИ, па и Артан Груби имаат тесни конекции со политички кругови во Албанија. Треба да видиме колкав политички притисок ќе се направи врз албанската влада за да се дозволи тоа негово испорачување таа негова екстадиција, но сепак треба да оставиме на МВР и Обвинителството пред се преку свои официјални канали да се изборат за негова екстрадиција“ вели Александар Нацев – универзитетски професор.
Никој нема да биде над законот, вклучувајќи го и Груби, дециден е вицепремиерот Меџити.
- „Пораката од Владата е дека никој не е над законот и секој што згрешил треба да одговара. Останува на МВР, судството и обвинителството да се занимаваат со случајот Груби и со другите“, рече Меџити.
Министерство за правда може да побара екстрадиција откако екс првиот вицепремиер ќе биде лоциран и уапсен бидејќи по него веќе е распишана меѓународна потерница. Тогаш, Министерството за внатрешни ја известува Правда, од каде се испраќа барањето за екстрадиција.
