Бесплатни учебници за сите ученици, реконструкција на над 50 училишта, нови спортски сали, базени и реновирани студентски домови – образованието останува главен приоритет на Владата. На првиот училишен ден, премиерот Христијан Мицкоски им посака успешна учебна година на сите ученици. Им порача дека пред нив е нова страница во животот, но и многу предизвици кои ќе треба да ги совладуваат со знаење, труд и поддршка од родителите, другарите и наставниците. Мицкоски меѓудругото кажа дека Владата ќе продолжи да вложува во подобри услови за учење – модерни и безбедни училишта за секој ученик.
“Тоа е нешто што до пред три години претставуваше мисловна именка. Нешто што беше невозможно. На учениците им се диктираше до пола учебна година, а некои и цела година не го добиваа учебникот. И сега овие од талогот како да ги заборавија тие времиња на предизвици кога немавме учебници, па ги гледам таа мала група од талогот како денеска се дрзнува да спомнува и дури би рекол, во одредена мерка да навредува. Ние како Влада продолжуваме и понатаму да вложуваме за нашите најмили, тоа се децата.Се градат базени, се градат спортски сали, се градат нови училишта, се доградуваат училишта, се реновираат” – истакна премиерот.
Главната причина за намалениот број на првачиња според претседателот на Владата е падот на наталитетот. Тој образложи со бројки дека секоја година се раѓаат околу 8.000 бебиња помалку, тоа во пракса значи помал број на првачиња и се повеќе празни училишни клупи. Во таа насока Мицкоски од учениците побара покрај знаење, од своите родители да побараат и братче или сестриче, како порака во контекст на се посериозниот демографски пад и затворањето училишта во земјава.
“Во 2025 година во Македонија се родиле околу 15.650 деца, додека во годините пред пандемијата бројката се движела меѓу 22.000 и 23.000 новородени годишно.Станува збор за 7.000 до 8.000 деца помалку во рок од седум-осум години“, рече Мицкоски.
Инаку, Владата веќе има конретна стратегија и мерки. Дел од тие мерки се применуваат, има шест бесплатни обиди за ин-витро, бесплатни учебници, нови градинки, поддршка за младите семејства како и полесен начин за купување прв стан.Дополнително се разгледуваат и мерки како даночни олеснувања за мајки, поддршка за семејствата и зголемување на свесноста за демографијата.
Ања Лукарова
