Полесен пристап до заедничкиот европски пазар, полесно вклучување во платежниот систем на ЕУ, побрзо укинување на Роамингот, и се тоа уште пред полноправно членство во Европската Унија. Ова го предвидува новиот документ за проширување. Се планира поголема интеграција на земјите кандидати, меѓу кои е и Македонија, потврди еврокомесарката Марта Кос. На панел дискусија на Бледскиот стратешки форум, истакна дека Брисел планира да ги прошири областите, каде аспирантите може да се приклучат, уште пред полноправно членство во ЕУ. Во документот за кој ќе се дискутира во октомври, ќе има четири области.
-Една од нив ќе биде како повеќе да се користи постепената интеграција на кандидатките. Постепена интеграција значи земјите кандидатки да добијат некои бенефиции пред членството. Сега морате да исполните 100 процентно преговори за да станеме членка. Постојат СЕПА и Роаминг каде кандидатките можеа веќе да ни се приклучат, но можностите се далеку поголеми. На пример заедничкиот пазар би можел да биде исто дел од оваа постепена интеграција. Потоа може да има нови безбедносни структури и друго каде и земјите-членки имаат корист, изјави Кос.
Од Самитот во Блед шефот на македонската дипломатија Тимчо Муцунски, оцени дека од Брисел доаѓаат охрабрувачки сигнали за нов пристап кон политиката на проширување и нејзиното приспособување кон актуелниот геополитички контекст. Според него вистинска пресвртница би било неколку земји од регионот да станат членки на ЕУ, што би било доказ дека термините ‘моментум’ и ‘прозорец на можности’, кои ги слушаме веќе неколку години, конечно се целосно разбрани и сфатени. Муцунски потенцираше дека барањето на Македонија е јасно– европската интеграција да биде модел за трансформација на институциите, а не обид за трансформација на нашите идентитети.
-Но во нашиот регион не само што е правично за нас да видиме акција, туку мислам дека заслужуваме да видиме акција, поради тоа колку се посветени нашите опшстества и колку се посветени нашите Влади. Нашата единствена молба е да ја гледате европската интеграција како модел за трансформција на нашите институции, а не да се обидувате да ги трансформирате нашите идентитети. Оценујавте не врз основа на заслуги и оценувајте не во ова геополитички турбулентно време, дали сме усогласени со надворешната и безбедносна политика на Европската Унија, изјави Муцунски.
Според најавите и очекувањата контурите за следното проширување на ЕУ треба да бидат дефинирани на Самитот на лидерите во октомври во Брисел. Покрај тоа, таму се очекува главни теми да бидат и други проблематични прашања, како што е усогласувањето на следната буџетска рамка на ЕУ за периодот по 2027-та, како и демократското назадување во некои од земјите членки.
Матеја Петровски
