Државната изборна комисија, Мисијата на ОБСЕ во Скопје и Швајцарската „Програма за изборна поддршка“ спроведувана преку Меѓународната фондација за изборни системи ИФЕС денеска организираат конференција на тема „Унапредување на изборното учество на жените преку податоци, придобивки и партнерства“.
Како што информираат од ДИК, конференцијата ќе биде посветена на можностите за унапредување на учеството на жените во изборните процеси преку користење на родово-разделени изборни податоци, креирање соодветни политики и мерки и зајакнување на партнерствата меѓу институциите, граѓанското општество, медиумите и меѓународната заедница.
Во рамки на настанот за првпат ќе бидат презентирани родово-разделени изборни податоци од Локалните избори 2025, со осврт на клучните трендови, сознанија и можности за нивно користење во насока на поголемо и суштинско учество на жените во изборниот процес.
На конференцијата ќе се дискутира и за политичките и законодавните мерки за зголемување на учеството на жените, меѓународните искуства и добри практики, како и можностите за родово-сензитивно финансирање на изборните кампањи. Посебен панел ќе биде посветен на улогата на граѓанското општество и медиумите во зајакнувањето на жените како гласачки и кандидатки, надминувањето на ограничувањата на изборните квоти, обезбедување суштинска застапеност на жените во процесите на носење одлуки како и родово сензитивното медиумско известување за време на изборите.
На конференцијата ќе се обратат претставници на Државната изборна комисија, Мисијата на ОБСЕ во Скопје, Амбасадата на Швајцарија во Македонија и Меѓународната фондација за изборни системи – ИФЕС, како и претставници на Собранието, граѓанскиот сектор, медиумите и меѓународни експерти.
