🎥 Клековски: Охридската болница наместо со современа апаратура, работела со историски музејски експонати

Додека над 200 медицински апарати, вредни преку 100 милиони евра, со години скапувале во подрумите на јавните здравствени установи низ државава, во охридската општа болница, која е најстара во регионов, 15 години не била набавена нова, современа апаратура. Она што се употребувало повеќе наликувало на музејски експонат. Ова за првиот човек на Фондот за здравство е непојмливо – болниците во охридско-струшкиот регион заслужуваат стручно и професионално да напредуваат.

„Да овозможиме и подобра инфраструктура во опрема, бидејќи за да се задржат докторите во овие краишта, не е доволно само платите да се зголемуваат, туку мора да има и соодветни услови за работа. За жал, чувте, апарати 15 години биле во употреба, значи, во основа се употребувале историски музејски експонати“ – вели Сашо Клековски, директор на Фонд за здравство.

Раководството на болницата, во кус период, со нова и современа апаратура ги поднови речиси сите одделенија. Последно пристигнаа два апарати за гинекологија и радиологија, вредни 3,5 милиони денари.

„Поентата е што помалку да се изложат граѓаните на малтретирање, на патување надвор од градот, што од своја страна значи дополнителни трошоци, значи воведување на нови процедури како во хируршките, така и во интернистичките гранки. Планови за подобрување на услугата во однос на реновирање и репарирање на деловите кои што се дотраени, со цел подобро да се чувствуваат пациентите“ – вели д-р Горан Маркоски, директор на општа болница Охрид.

Обезбедена од македонските иселеници во Швајцарија, донација во медицинска опрема и апарати, вредна околу 100.000 евра, доби и болницата „Свети Еразмо“. Таму, после една деценија, конечно ќе биде пуштен во употреба новиот болнички блок – проект чија реализација запре во 2017-та. Во моментов се врши ревизија за да се утврди во каква состојба е истиот.

„Фактички не прави подготвени, во еден многу краток период по оспособувањето и завршувањето на ревизијата и проценката на проектот, еден дел од истиот да биде веднаш ставен во употреба“ – вели д-р Харалампие Шокароски, директор на болницата „Свети Еразмо“.

Десет години се работи во супстандардни услови – дневно низ четирите амбуланти поминувале околу 400 пациенти, се работело во само две операциони сали кои не ги задоволувале условите, а поради недостаток на простор буквално немало каде да се сместат ниту оперираните пациенти, а камоли да им се овозможи нивна рехабилитација. Со пуштањето на новиот болнички блок, вели Шокароски, ќе се создадат достоинствени услови за лекување и рехабилитација на пациентите.