Државното здравство ги губи најдобрите. После сите скандали проврзани со онкологија, Клиниката останува и без еден од најдобрите доктори во оваа установа. Онколошките пациенти разочарани на социјалните мрежи алармираат за заминувањето од клиниката на докторката Даниела Попоска, и исплашено прашуваат ќе има ли кој да ги лекува? Според коментарите, нивната надеж за брзо оздравување им била токму таа, која сега веќе преминува во приватното здравство. Директорката на онкологија Виолета Клисаровска информира дека сите нејзини пацинети од одделот за третман на малигни тумори на дојка ги преземеал друг специјалист, но за одливот на лекари и таа е загрижена.
“Недостатокот на кадар е голем проблем воопшто со целиот здравствен кадар, не само со доктори. Постојано на тоа се укажува и во моментов имаме активно барање до МЗ за вработување” – вели директорката на онкологија, доктор Виолета Клисаровска.
Бројот на онколошки пацинети секојдневно се зголемува, а бројот на доктори е се помал на клиниката – дали ќе преземе нешто ресорното министерство, одговор не добивме.
Болните со канцер,според наши информации се соочуваат со немање на соодветна терапија, која пак може од свој џеб да ја купат во некоја соседна земја. Опасност има и од недостиг на постоечите лекови по новогодишните празници. Немаат ниту термини за потребните испитувања.
“Јас после четири месеци добив термин за скен на коски, имам пријателка која што чека читање на веќе направено снимање на гради, таа веќе три недели чека да и ги прочитат резултатите.Што ја комплицира нејзината состојба, која што веќе е лоша.Постојано е проблемот со наоѓање на термини, за пет скен се чека 5 месеци па и доколку ви пишат дека е итно” вели Ана Марјановиќ, онколошки пациент.
Инаку, според информациите од Македонското лекарско друштво, за една деценија, Македонија загубила околу 2.000 лекари.
Главни причини за одливот на доктори се недостигот од современа опрема, ниските плати и работното оптоварување.
