Катица Јанева барала спогодба за исплата на штета наместо затворски казни за осомничените во случајот „Поштенска банка“ на СЈО, ова денеска пред судот во улога на сведок го кажа обвинителот Бурим Рустеми, кој беше дел од Обвинителството на Јанева.
Застапникот на овој предмет, сведочеше и дека кога се подготвувале предлозите за замрзнување на имотот на осомничените, шефицата на СЈО дала насока еден од становите на Томе Главчев, да не биде опфатен, бидејќи ќе добиел нов сопственик. За кој подоцна испаднало дека е поранешниот директор на МЕПСО, Сашо Василевски, кој важи за близок пријател на Катица Јанева. Рустеми вели ова сознание до кое стигнал со помош на колешката Лиле Стефанова не било воопшто пријатно.
-Следуваше подготовка за предлози за замрзнување на имоти на дел од осомничените, за Томе Главчев и Ратко Димитровски. Беше утврден нивниот имот кој го поседуваат тие и нивните компании и се подготвуваа предлозите да се забрани отуѓување. За еден стан кој се наоѓа во Скопје, сопственост на едно од друштвата на Томе Главчев, Катица Јанева побара истиот да се тргне од замрзнување зошто тој бил продаден на нејзини пријатели и со тоа би нанеле штета на купувачите. Јас го сторив тоа, порача Рустеми пред судот.
Рустеми не сакаше исказот да коментира пред медиумите, а најави дека за неколку месеци ќе се знае дали предметот „Поштенска банка“ ќе заврши со обвинение.
-Па има уште неколку месеци… Најверојатно ќе одлучиме откако ќе се заврши, изјави кратко Рустеми.
Одбраната немаше прашања кон денешниот сведок. Адвокатката на Јанева, Ирена Фрчкоска изрази задоволство од сведочењето на Рустеми.
-Исказот беше коректен, само го потврдува она што ние го велиме, дека Катица Јанева воопшто ниту влијаела, ниту се мешала во постапувањето на обвинителите, изјави Фрчкоска.
Рустеми сведочеше и дека Катица Јанева побара од него на Главчев да му го врати пасошот, со гаранција од еден милион евра. Тој кажа дека во дискусија со колегите, одлучил да прифати земајќи ја во предвид висината на сумата.
Матеја Петровски
