– Отсекот за превенција при СВР Куманово, во соработка со Општинскиот совет за превенција на детското престапништво при Општина Куманово, денеска спроведе кампања за безбеден сообраќај и безбеден јавен превоз на патници и ученици, информираа денеска од општина Куманово. Кампањата е насочена кон фирмите кои вршат автобуски јавен превоз на патници, со акцент на неопходноста од користење технички исправни возила и почитување на законските обврски за нивна проверка и одржување.
Од СВР Куманово апелираа до возачите на автобуси, сопствениците на превозничките компании и сите други субјекти кои вршат меѓуградски, меѓуопштински и превоз на ученици, одговорно да се однесуваат и навреме да го отстрануваат секој, па и најмал дефект на возилата. Истовремено, ги потсетуваат на обврската за редовен технички преглед на автобусите на секои шест месеци. Воедно, надлежните апелираа и до превозниците кои вршат меѓународен превоз на патници пред секое поаѓање да извршат детален преглед на автобусите, со цел да се обезбеди безбедноста на патниците.
Во случај на настанување сообраќајка или друг настан како последица на технички неисправно возило, при што е загрозен животот на патниците, како што посочуваат, ќе се преземаат најстроги законски санкции против возачите и сопствениците на возилата, односно правните лица.
Целта на кампањата е унапредување на безбедноста во сообраќајот и обезбедување сигурен превоз за патниците и учениците кои ги користат услугите на кумановските превозници.
