Републичкиот совет за безбедност на сообраќајот на патиштата (РСБСП) започнува кампања насочена кон унапредување на безбедноста во сообраќајот на мотоциклистите која ќе се реализира во соработка со МВР, Факултет за Безбедност-Скопје, Мотоциклистичката федерација.
Во услови на зголемена мобилност и се поголемо присуство на мотоцикли во сообраќајот, мотоциклистите остануваат една од најранливите категории учесници. Кампањата има за цел да ја подигне свеста за ризиците, да поттикне одговорно однесување во сообраќајот и да ја зајакне културата на меѓусебно почитување помеѓу сите учесници во сообраќајот.
Под мотото Вози Одговорно-Секој живот е важен, испраќаме јасна порака: Безбедноста не е избор, туку обврска на секој учесник во сообраќајот. Возењето мотоцикл бара високо ниво на концентрација, дисциплина и почитување на сообраќајните правила и прописи, но истовремено бара и зголемена внимателност од страна на останатите возачи. Мотоциклистите се директно изложени на зголемен ризик од сообраќајни незгоди, како последица на непочитување на сообраќајните правила од страна на сите учесници во сообраќајот.
Преку оваа иницијатива РСБСП упатува апел до мотоциклистите – секогаш да користат заштитна опрема, да возат одговорно и согласно сообраќајните прописи, до возачите на моторни возила – да ја зголемат внимателноста, особено при престројување, вклучување и свртување, а до институциите – да продолжат со зајакнување на превентивните и контролни механизми.
– Преку заеднички допринос преку почитување на сообраќајните правилата и прописите, континуирана едукација можеме да изградиме побезбедни патишта за сите – се наведува во соопштението од РСБСП.
