Почна замената на водоводната, канализационата мрежа, како и на сите инсталации кои поминуваат низ стариот Камен мост во Штип. По нивната замена ќе почне и реконструкцијата на мостот на река Брегалница, кој меѓу штипјани е познат и како Султанов мост.
Градоначалникот на општина Штип, Иван Јорданов на денешната прес-конференција рече дека станува збор за еден мост, кој е културно богатство на градот Штип и кој заслужува да биде соодветно реставриран, за да се истакне историската вредност што ја има.
-Тоа коешто во моментов се работи е промена на старите инсталации кои се наоѓаат на самиот мост, а веднаш по завршувањето на овие активности поврзани со инсталациите ќе се продолжи со негова реставрација, третирање, осветлување со цел да ја добие автентичноста, автентичниот изглед, но и соодветно да биде истретиран-вели Јорданов.
Тој истакна дека влегувањето во поголемите градежни зафати ќе зависи и од тоа кога ќе заврши целосната реконструкција на мостот на река Брегалница кај ЈП „Македонијапат“.
- За тоа кога ќе влезат активностите поврзани со сообраќајот на овој мост ќе зависи од завршувањето на активностите поврзани со мостот кај „Македонијапат“, кој верувам дека на 7 октомври ќе биде пуштен во употреба, целосно реконструиран, за да можеме подетално да навлеземе во реконструкцијата на Камениот мост, на кој во моментов се спроведуваат активности за промена на самите инсталации поврзани со водовод и другите инсталации кои се наоѓаат на самиот мост-појасни Јорданов.
Општина Штип за градежните активности кои во моментов се извршуваат издвои осум милиони денари.
