Распишан е јавен повик за учество во „Обука за финансиска писменост на жените“, соопштија денеска од Општина Центар.
Како што се појаснува во соопштението, на обуката може да учествуваат жителки на општина Центар, со најмалку завршено четиригодишно средно образование, кои се невработени и евидентирани во Агенцијата за вработување и се на возраст од 20 до 50 години.
– Да се биде финансиски писмен е клучно за секој поединец, без оглед на полот, за да може да донесува добри финансиски одлуки и да изгради сигурна и стабилна финансиска иднина. Оваа обука е чекор кон поголема информираност, самостојност и економско зајакнување на жените – порача градоначалникот на општина Центар, Горан Герасимовски во пишаната изјава.
Како што се истакнува, целта на обуката е развој на женското претприемништво и финансиската писменост, што ќе придонесе кон поголема економска независност и развој на претприемачкиот потенцијал на жените.
Повеќе детали за обуката може да се најдат на веб-страницата на општината.
