Со години била жртва на насилство од страна на нејзиниот сопруг. Пријавувала, биле изрекувани заштитни мерки, но малтретирањето не сопирало. Ја напуштила својата татковина, но сепак ја нашол и ја запалил жива пред очите на нивното заедничко дете.
Оваа потресна судбина на една жена денес можеше да се слушне на конференцијата, организирана од ОБСЕ, за борба против фемицидот, проблем кој и понатаму треба да се решава на глобално ниво. Експертите велат дека на убиството на жени и девојки често му претходи историја на контрола, демнење, закани, физичко, психичко, како и сексуално насилство.
На дводневната конференција беше испратена едногласна порака дека „фемицидот може да се спречи“. Експертите посочуваат – земјите да се осврнат прво кон обуки за обвинителите и судиите, за тоа како да ги препознаваат и во која насока да се движат истрагите.
