Доколку се изгради дестилерија во Кавадарци, ќе се намалат финансиските загуби на тиквешките лозари. Количините вишок грозје, како и неквалитетниот род кој откупувачите не сакаат да го откупат, со ова можат да завршат како дестилат наместо на депониите, а за што лозарите, секако, би добиле и соодветен надоместок, смета кавадаречкиот градоначалник. Дестилеријата би функционирала под капата на Министерството за земјоделство, со што од неа корист би имале и лозарите, но и државата.
„Притискаме максимално во програмата на Министерството да влезе и да се одвојат средства за изградба на таа дестилерија. Не се енормни средства, не се незамисливи средства, тоа се некои 6–8 милиони евра за комплетната изградба на дестилеријата, која што ќе акумулира негде до 30–40 милиони килограми грозје, од кои што ќе треба да произлезе околу 5–6 милиони литри дестилат“, – вели Митко Јанчев, градоначалник на Кавадарци.
Овој проект се заговара веќе 8 години, за што е направена и физибилити студија. Меѓутоа, тој не поминал кај претходната власт, за разлика од сегашнава, кај која има интерес и на овој начин да им помогне на лозарите за поисплатливо земјоделство.
„Комплетната физибилити студија, со уназад 20 години на род и квалитет на грозје, беше предадена во Влада во 2018 година, во јануари месец. И приемно бројче имаме, и штембилно бројче, и дека ќе нè викнат на Влада и дека ќе разговараме за темата. Немаше ништо! И верувам дека оваа Влада сега треба да ја спроведе таа заложба за изградба на дестилерија“, – потенцира Јанчев.
Според него, дестилеријата не мора да биде ниту општинска, ниту со јавно-приватно партнерство, туку може да биде државна, со што државата ќе добие можност – алкохолниот дестилат да го прибере во стоковите резерви и потоа да го користи за свои цели.
Од друга страна, заинтересираноста на оваа Влада континуирано да им помага на земјоделците, вклучително и на лозарите, се потврдува и со последната исплата на повеќе од 7,8 милиони евра за 12.458 лозари за одржување на постојни лозови насади.